ԳԱԱ «Փորձաքննությունների ազգային բյուրո» ՊՈԱԿ-ի տնօրենի գիտության գծով տեղակալ, քիմիական գիտությունների դոկտոր Պատվական Ոսկանյանը մայիսի 25-ին մասնակցել է ՀՀ ներքին գործերի նախարարությունում կայացած թմրամիջոցների ապօրինի շրջանառության դեմ պայքարի ռազմավարության մշտադիտարկման միջգերատեսչական խորհրդի նիստին:
ՆԳ նախարարության ղեկավար կազմի, գերատեսչության և հասարակական կազմակերպությունների ներկայացուցիչների մասնակցությամբ անցկացված նիստի ընթացքում ներքին գործերի նախարարն ընդգծել է, որ ռազմավարությամբ առաջին անգամ մեկտեղվում և փոխլրացնում են հանրային անվտանգության և հանրային առողջապահության բաղադրիչները՝ ապահովելով խնդրի առավել ամբողջական և համակարգային հասցեագրում։
Միջգերատեսչական քննարկման շրջանակներում Պատվական Ոսկանյանը ներկայացրել է Փորձաքննությունների ազգային բյուրոյի առանցքային դերը թմրամիջոցների ապօրինի շրջանառության հակազդման և ապացուցողական բազայի ձևավորման գործում:
Նա հանգամանալից անդրադարձել է թմրամիջոցների, հոգեմետ նյութերի և դրանց պրեկուրսորների փորձաքննությունների ընթացքում նորագույն՝ քրոմատո-մաս-սպեկտրոմետրիկ սարքավորումների ու մեթոդների կիրառմանը, լաբորատոր արդի հնարավորություններին, ինչպես նաև շրջանառության մեջ հայտնվող նոր հոգեներգործուն նյութերի և սինթետիկ թմրամիջոցների նույնականացման առանձնահատկություններին: 
Պատվական Ոսկանյանը կարևորել է գիտականորեն հիմնավորված մեթոդների և մեթոդիկաների շարունակական ներդրումը՝ թմրաշրջանառության դեմ պայքարի արդյունավետության բարձրացմանն և հանցագործությունների օպերատիվ բացահայտման համատեքստում:

29 May 2026